تلقيت مكالمة تليفونية من موظف كبير في السفارة الأمريكية أول أمس لدعوتي لمقابلة الرئيس الأمريكي جورج دابليو بوش – أيوة هو لسه رئيس لحد ما أوباما يمسك  – والصراحة أنا إستفوجئت بالدعوة دي وتذكرت إن بوش كان قابل مدون عراقي من فترة كده بس هو يقابل مدون عراقي يمكن علشان هما محتلين العراق لكن عايز يقابلني انا ليه؟ لو المقابلة في اطار ان انا صحفي او حتى مدون وهاعمل انترفيو حصري مع بوش وافرمه في الأسئلة يبقى اشطة لكن مقابلة بوش في حد ذاتها ليست شرف اقابل بوش ليه؟

بوش مش رئيس جمهورية بلدي ولا ولي أمري ولا ولي امر العالم كما هو متخيل. بوش مش رمز لأي حاجة كويسة أصلا علشان حد يتشرف أو يتكرم بمقابلته. مقابلة بوش تلطخ أي شريف وليست تشريف أو تكريم. انا مالياش حاجة عند بوش ولا طالب منه حاجة ولا في ايده اي حاجة ليا وحتى لو في ايده انا مش عايزها وانا اصلا ضد فكرة اي تدخل امريكي في مصر لا بالخير ولا بالشر – انا عايزه يكف اذاه بس ويبطل مساعدة ومساندة النظام المصري. سيبكم من غزو العراق والبلاوي الكتير التانية اللي بوش عملها في العالم كله انا كفاية عليا ان بوش يقول مبارك رجل سلام. انا لم ارفض هذه الدعوة لخوفي من الانتقاد او بمعنى اصح الشرشحة بتاعة بعض التيارات السياسية لان بصراحة احنا في مصر لا عندنا تيارات سياسية ولا بطيخ من بابه ولان ببساطة كمان هاقابل بوش بتاع ايه مش علشان انا قليل لا بالعكس علشان بوش ده ايه اصلا بوش مش نلسون مانديلا ولا غاندي ولا الام تريزا الله يرحمها ولا حتى بانكي مون اللي زي قلته

انا الصراحة لو كانت جات لي دعوة لمقابلة اوباما – ومحدش يزعل مني – كنت ها ارحب جدا على الاقل الحق قبل ما اوباما يمسك ويوسخ الدنيا وتبتدي الناس تنتقده ببساطة لاني ها اقابل رمز تاريخي للتغيير في امريكا ورمز لرئيس دولة منتخب ديمقراطيا بجد والناس بتحبه وعندها امل فيه وده نموذج نتمنى نشوفه في كل دول العالم بداية بمصر وممكن كمان اتجرا واقول ان انتخاب اوباما من اهم الاشياء منذ حركة الحقوق المدنية للسود ورموزها زي مارتن لوثر كينج ومالكوم اكس
لكن بوش ده رمز لإيه؟ انا باشتغل على الحريات السياسية والفردية وعلى مقاومة القمع والعنف والديكتاتورية بوش بيرمز لإيه في اللي باشتغل عليه؟

الادارة الامريكية القديمة للاسف عارفة انها رايحة وبتشتغل بمبدأ يا رايح كتر من الفضايح وبتعمل انها بتكرم عدد من المناضلين في حين انها في الحقيقة بتلوثهم وعايزة تنسب الفضل في نضالهم ونجاحهم لنفسها قبل ما تمشي. أنا باحب الشعب الأمريكي والشعب الأمريكي هو اللي بيحتضني ويكرمني وليست الإدارة الأمريكية

وربما أمريكا ليست النموذج الامثل في حرية الصحافة ولا الاحزاب السياسية
لكن تجربة المجتمع المدني الامريكية جديرة بالاهتمام